1Th 3 | PMA | STEP | Sakini, veni metrolestei kami tuetin, tinomeitel mah ven kami, ka metmundemi tahos keke inau komal Saelas melhetos en taon ten out Athens,

1 Thessalonians 3

1 Sakini, veni metrolestei kami tuetin, tinomeitel mah ven kami, ka metmundemi tahos keke inau komal Saelas melhetos en taon ten out Athens, 2 ka melsila Timoti vat ven kami keke vakataun kami ka vasakin demkatien onami vakeih tamun. Kei vi tuomal koa mum vituai ral min komal en umen onen Ahi keke metmul metvitehiten more longlongien usil Iesu Kristo min meatin keil. 3 Kei va ven kami vasakini tovuol en kami vahiles eris ran demkatien onen ven mahien keil ekek koa mimul mikuri. Anatin, kami mikilea keke Ahi ling kati keke rehekur mahien keil en moulien orer. 4 Veni navong metro semau ral min kami, metviteni min kami keke ir rehekur mahien. Ka suval kami mikilea revi tuai, tounah koa kur out musil asa koa metviteni. 5 Navong nakur longlongien keke sakvisien keil mai en kami, tinok mah. Sakini, nasila Timoti vahotini keke demkatien onami mukave. !Nametauni keke Temat nalamun kami minaha ran sise koa mal ka nasakin umen vasi keil onomeitel nahi heisav enges!

Pol Si Kei Houlu Mok ven Longlongien Usil Sakien Hos Keil Onen Me-Tesalonaeka Keil

6 Kosa, Timoti mai ris. Ka kei kur longlongien hos mai ven komal usil demkatien ka envatien onami. Kei viteni min komal keke, lises, kami mirendem tahos en komeitel, ka emivati mivales komai suval etin koa komeitel emeitelvati mok metvales kami. 7 Sakini, tuameitel ka ahinameitel keil, avaseini metmul metkur mahien ka sakvisien keil houlu, longlongien enek usil demkatien onami vati lat rendemien onomeitel houlu. 8 Anatin, navong metlonge keke mimulomal keih veah en demkatien onami en Asuv Iesu, moulien onomeitel mai ris tahos. 9 Metsakras metvamasmas Ahi vavinvin ven sien koa mariso mok koa metkuri ven kami navong metva netan mini en hisien keil onomeitel. 10 Meneai ka vongien metvis Ahi keih keke vamaen komeitel metvales ris veinami ka metvasan hihiseien sav keil koa mirkurtei veah vakataun demkatien onami.

11 Metvisi keke Ahi Tamer ka Iesu, Asuv orer, luhesak mesen sise keke metvamai ris ven kami. 12 Metvisi keke Asuv Iesu hesakin envatien onami hemoul hemarite mok ka hemai hemariso hesuval vati envatien onomeitel ven kami keke emihehathat kami eris ka emihehat meatin sav vasi keil emun. 13 Ka metvisi mun keke hesakin rendemien onami hekeih imok keke mihehi votut ka mihetolas en meten Ahi Tamer navong Iesu, Asuv orer, hemai hetal min meatin keil onen koa avi votut.